Голема опасност од истекување на азотна киселина предизвика вонредна состојба во германскиот град Крефелд, откако камион со таков товар се преврте на автопатот А57. Несреќата предизвика масовна интервенција на итните служби, затворање на патот и прекин на повеќе железнички линии кон Диселдорф.
Инцидентот се случил во текот на ноќта во близина на клучката „Крефелд-Центрум“. Возачот на камионот бил повреден и пренесен во болница, додека од возилото започнала да истекува корозивната супстанција.
На терен се испратени околу 150 пожарникари и припадници на итните служби кои со специјализирана заштитна опрема работат на спречување на понатамошно истекување. Поради хемискиот ризик, властите воспоставија безбедносна зона во радиус од еден километар и целосно ја затворија делницата на автопатот А57 меѓу Крефелд-Опум и Крефелд-Гартенштат.
Сообраќајниот колапс опфати и повеќе регионални железнички линии, меѓу кои RE 10, RE 7, RE 42, RB 33, RB 35 и RB 37, поради што патниците кон Диселдорф се соочуваат со откажани возови и доцнења.
Германските власти преку апликацијата „NINA“ издадоа предупредување за екстремна опасност до жителите на погодената област. На граѓаните им е препорачано да ги затворат прозорците и вратите и да ги исклучат климатизациските системи, додека четири училишта и две градинки во Крефелд се затворени.