Полскиот претседател Карол Навроцки во петокот го скрати своето официјално патување во Сенегал и итно се враќа во Полска, откако полицијата влезе во просториите на Уставниот суд и беше објавена суспензијата на претседателот на судот, Богдан Швјенчковски.
Поводот за враќањето го потврди самиот претседател преку социјалните мрежи.
„Во вакво време, претседателот мора да биде во Полска. Го скратувам патувањето во Сенегал и се враќам“, напиша Навроцки на платформата X, пренесува Ројтерс.
Според соопштението од полската полиција, нивни службеници интервенирале и влегле во објектот на Уставниот суд по ескалација на инциденти пред зградата, каде што кон полицајците биле фрлани опасни предмети.
Речиси истовремено, Уставниот суд на својата официјална веб-страница објави дека претседателот на институцијата, Богдан Швјенчковски, е суспендиран од функцијата.
Судот веќе подолг период се наоѓа во длабок политички спор кој практично целосно ја има блокирано неговата редовна работа.
Навроцки, кој важи за сојузник на претходната полска влада, претходно годинава одби да положи заклетва пред тројца од шесте судии избрани од парламентот.
Од друга страна, Швјенчковски спречуваше судиите избрани од актуелното парламентарно мнозинство да стапнат на функција, со што кризата дополнително се продлабочи.