Сопственикот на приватната болница „Санте Плус“, Билал Кара, е меѓу приведените во денешната акција на Министерството за внатрешни работи, во која се опфатени и вработени во Фондот за здравствено осигурување, дознава „Фокус“.
Според неофицијалните информации на „Фокус“, Кара веќе бил спроведен во Кривичниот суд и изведен пред судија на претходна постапка. Во акцијата, како што дознава порталот, била пронајдена и уапсена и Гериана Арапи, поранешна директорка на болницата.
Кара е лице по кое Албанија лани распиша потерница поради сомнежи за злоупотреби поврзани со приватната клиника „Интернешнл Медикер“, поранешна „Санте Плус“, која работела во соседната земја.
Според тогашните пишувања на албанските медиуми, клиниката била блокирана поради сомневања за непријавен профит од околу еден милион евра. При контролите, наводно, биле откриени и лекови со истечен рок или шверцувани производи, како и петмина вработени кои не биле осигурени.
Билал Кара пред три години беше именуван за почесен конзул на Македонија во Република Турција, со седиште во Измир.
Од МВР соопштија за приведувањата: -По наредба на надлежен јавен обвинител од ОЈО за ГОКК, полициски службеници ги лишиле од слобода Б.К. и Г.А.
Б.К. се сомничи за „перење пари и други приноси од казниво дело“, додека Г.А. е осомничен за „злоупотреба на службената положба и овластување“ и „измама во службата“.