Американскиот крстосувачки брод „Одисеја“, кој е на три и полгодишно патување околу светот, ја прекина пловидбата во Камбоџа поради наглото зголемување на трошоците за гориво поврзани со војната во Иран, принудувајќи 203 патници да се симнат од бродот, соопшти денеска компанијата што управува со пловилото.
Растот на цените на горивата е директно поврзан со намалениот поморски сообраќај низ Ормуската Теснина од почетокот на војната во Иран, што влијаеше врз снабдувањето со нафтени деривати, особено во Југоисточна Азија. Компанијата „Вила Ви Резиденс“, со седиште во Флорида, соопшти дека месечните трошоци за гориво по бродска кабина, кои претходно во просек изнесувале 1.800 долари, во одредени делови на Азија се зголемиле на проценети 6.000 до 8.000 долари.
„Не бевме во можност да продолжиме да ги покриваме настанатите оперативни загуби“, соопшти компанијата, додавајќи дека обидите да се намали потрошувачката со побавно пловење и подолг престој во пристаништата не биле доволни за да се надомести растот на трошоците. Компанијата соработува со патниците за организирање на нивното симнување и пронаоѓање привремено сместување.
Бродот моментално е закотвен во пристаништето Сихануквил во Тајландскиот Залив, а датумот за продолжување на патувањето сè уште не е официјално потврден. Според камбоџанските претставници, на бродот имало и 156 членови на екипажот. Заменик-гувернерот на провинцијата Преа Сиханук изјави дека се очекува бродот да ги надополни резервите на гориво и да ја напушти Камбоџа в сабота, но операторот сè уште го нема потврдено датумот на испловување.
„Одисеја“ исплови од Белфаст во октомври 2024 година на патување за кое првично беше предвидено да трае три и пол години. Компанијата го рекламираше патувањето како можност за долгорочен живот на море, со почетни цени за купување апартмани од околу 230.000 долари.