Во повисоките предели и на планинските превои во западна Македонија вечерва започна да паѓа првиот снег, при што најинтензивни врнежи се забележани на Попова Шапка и на планинскиот превој Стража.
Според видеоснимките и информациите од терен снимени на магистралниот пат Гостивар – Кичево, врнежите започнале во доцните попладневни часови. И покрај тоа што снегот засега не се задржува директно на коловозот и сообраќајот се одвива без поголеми прекини, надлежните служби апелираат до возачите за зголемена внимателност и задолжително прилагодување на брзината кон зимските услови на патот.
Метеоролозите најавуваат променливо и постудено време, со можност за нови врнежи од дожд и снег на повисоките патни правци во земјата во текот на наредните денови.