Вториот ребаланс на буџетот не носи фискална консолидација, туку го задржува зголемениот дефицит на високо ниво, додека јавниот долг останува опасни блиску до законскиот праг од 60 отсто од БДП, истакна пратеничката од СДСМ и претседателка на собраниската Комисија за финансирање и буџет, Сања Лукаревска, за време на денешната комисиска расправа.
Лукаревска нагласи дека документот претставува јасна потврда за нереалното планирање на владините економски политики, потсетувајќи дека додека во јули зголемениот дефицит се правдаше со развојни капитални инвестиции, октомвриските бројки покажуваат нивно кратење.
„Во јули дефицитот беше зголемен за околу 7 милијарди денари поради капитални расходи, но во октомври тие се намалени на 40,1 милијарда, што е речиси идентично со почетниот план, додека дефицитот останува висок. Дополнителните инвестиции се повлечени, тековните расходи растат, а приходите се ревидирани надолу“, истакна Лукаревска.
Таа додаде дека се кратат средства од клучни сектори како што се животната средина, енергетиката, образованието и здравството, додека пак за граѓаните нема предвидено мерки за зголемување на минималната плата ниту соодветна поддршка за справување со зголемените животни трошоци. Според неа, синдикалната минимална кошничка надминала 70.000 денари, додека платите не ги следат реалните поскапувања на терен.