Православните верници следната недела на 27 октомври го празнуваат денот посветен на Преподобната мајка Параскева, во народот познат како Петковден, еден од најраспространетите и најпочитуваните празници кај македонскиот народ.
Света Петка била од словенско потекло, родена во градот Епиват. По смртта на нејзините побожни родители, заминала во Јорданската пустина, каде што во пост и молитва го поминала најголемиот дел од животот. Се успокоила во 11-тиот век во родното место, а нејзините чудотворни мошти денес почиваат во градот Јаши, Романија.
Во православната традиција се одбележуваат три личности со истото име Параскева-Петка, поради што кај народот често се меша нивниот спомен. Покрај денешната Света Петка Епиватска (Трновска), црквата ги чествува и Света Петка Римјанка (26 јули/8 август) и Света Петка од Иконија (10 ноември/28 октомври).
Кај нашиот народ Света Петка се смета за заштитничка од разни несреќи и болести, поради што е позната и како мајка Параскева. Во нејзина чест, голем број македонски семејства празникот го одбележуваат со домашни служби и чекање гости, а за нејзиното име се поврзани и многубројни лековити извори познати како Петочни води.
Денеска именден празнуваат сите што ги носат имињата: Петко, Петкана, Параскева, Пенка и нивните изведени варијанти.