Шест лица, меѓу кои три деца, загинаа во руски напад со дрон врз парк во градот Нова Водолаха, во Харковскиот регион во североисточна Украина, објави регионалниот гувернер Олех Синехубов.
Дронот го погодил централниот парк во момент кога таму имало голем број луѓе и семејства со деца, изјави украинскиот министер за внатрешни работи Иван Вигивски. Нападот се случил околу 16:30 часот по локално време, а според прелиминарните податоци на обвинителството, користен бил дрон од типот „Геран-3“.
На социјалната мрежа „X“ се огласи и украинскиот претседател Володимир Зеленски, кој ги објави деталите за загинатите и повредените.
Ужасен руски напад во регионот Харков. „Маченикот“ директно удрил луѓе – во парк, до обично кафуле. Чист криминал. Шест лица биле убиени, вклучувајќи деца. Мало девојче, Ангелина, кое било во количка, било убиено во нападот. Имаше нешто повеќе од една година, родена е во август 2025 година. Нејзината мајка се викаше Ина. Починала во болница. Второто девојче кое загина имало 11 години. Изразувам сочувство до нивните семејства и најблиските. Уште 14 лица беа повредени, вклучувајќи шест деца – напиша Зеленски.
Тој апелираше за засилување на воздушната одбрана и одржување на санкциите кон Русија.
Ова се ужасни фотографии, но зад нив стојат уништени животи и вистината за оваа војна. Животите мора да бидат заштитени. На Украина ѝ е потребна воздушна одбрана. Човек не може да размислува за заработка со Русија сè додека таа продолжува со својата бесмислена војна. Бараме санкциите против Русија да останат на сила сè додека убивањето продолжува – истакна украинскиот претседател, повикувајќи ги САД и Европа на итна и силна поддршка.
Украинскиот омбудсман за човекови права Дмитро Лубинец порача дека светот не смее да се навикне на убивањето деца и цивили, додека обвинителството започна предистражна постапка за воено злосторство.