Резултатите од изборите во Брвеница покажуваат дека СДС има послаб резултат во споредба со минатогодишните локални избори, додека ВМРО-ДПМНЕ бележи значителен раст на поддршката, се наведува во соопштение на ВМРО-ДПМНЕ.
Од партијата посочуваат дека СДС на вчерашните избори освоил 706 гласа за својот кандидат за градоначалник, што е за 57 гласа помалку од 763-те гласови што истиот кандидат ги добил минатата година како носител на советничката листа.
„Истиот човек лани, како носител на листа за советници, освоил повеќе гласови отколку годинава како кандидат за градоначалник“, наведуваат од ВМРО-ДПМНЕ.
Наспроти тоа, според партиските податоци, ВМРО-ДПМНЕ остварило раст на поддршката. Минатата година советничката листа на партијата освоила 2.371 глас, додека на вчерашните избори за кандидатот за градоначалник Стојанчо Радичевски гласале 2.943 граѓани.
Од ВМРО-ДПМНЕ оценуваат дека овие бројки покажуваат зголемена поддршка за нивниот кандидат и отфрлаат дека СДС остварил подобар резултат во споредба со претходните локални избори.