Претседателот на Собранието, Африм Гаши, во Рим се сретна со претседателот на Претставничкиот дом на Холандија, Том Ван Кампен, во рамки на конференцијата на претседатели на парламенти на земјите членки на Советот на Европа.
На средбата Гаши ја истакнал поддршката што Холандија ја дава на земјава преку проекти насочени кон јакнење на демократијата и спроведување на реформите.
Разговорот бил насочен и кон европската перспектива на Македонија. Ван Кампен споделил дека во претходниот парламентарен мандат бил известител во Комисијата за европски прашања за европските перспективи на земјите од Западен Балкан.
Гаши, пак, ги презентирал актуелните состојби во евроинтегративниот процес и предизвиците што ги носи неговото одложување. Двајцата соговорници ја потврдиле важноста на членството во Европската Унија и потенцијалот на пристапните преговори да поттикнат значајни општествени промени. Планот за раст и Реформската агенда биле оценети како важни чекори за спроведување на реформите и приближување кон европските стандарди.
На средбата било разговарано и за продлабочување на соработката меѓу двата парламента, преку директни контакти меѓу пратениците и размена на искуства меѓу парламентарните служби. Иако холандскиот парламент нема група за пријателство со Македонија, соговорниците изразиле подготвеност за унапредување на односите, вклучително и преку посети на високо ниво.