Општина Пробиштип реализира инфраструктурни проекти вредни над 100 милиони денари, насочени кон подобрување на условите за живот на граѓаните, соопшти ВМРО-ДПМНЕ.
Од партијата наведуваат дека во изминатиот период биле изградени и реконструирани повеќе улици, меѓу кои „3-та“, „3-ти Април“, „Јаким Стојковски“, „Ленинов плоштад“ и „Никола Карев“.
Целосно бил реконструиран и патниот правец од Пробиштип до селото Кундино, додека во тек се градежни работи за реконструкција на патот меѓу селата Горни и Долни Стубол.
Според ВМРО-ДПМНЕ, во тек е и реконструкцијата на планинарскиот дом „Црн Врв“, а се гради и нов паркинг-простор во Лесново.
Од партијата информираат дека Општина Пробиштип вратила над 50 милиони денари од општинскиот долг, а се подготвуваат и нови проекти во вредност од дополнителни 70 милиони денари.
ВМРО-ДПМНЕ посочува дека инвестициите се насочени кон унапредување на патната инфраструктура, водоснабдувањето, спортот и урбаниот развој во општината.