На Форумот на идни глобални лидери организиран од World Economic Forum во Дубаи, се обратив на сесијата „Trade in a Changing World“, посветена на промените во глобалната трговија, економската отпорност и иднината на меѓународната соработка. Ова на Фејсбук го напиша министерот за надворешни работи, Тимчи Муцунски.
-Истакнав дека глобалниот трговски систем мора да се приспособи на реалностите на 21 век. Отвореноста и безбедноста не треба да се гледаат како спротивставени цели – отпорноста не значи изолација. За помалите економии, конкурентноста не произлегува од големината, туку од способноста да бидат сигурни и предвидливи партнери. Големите економии се натпреваруваат преку обем. Малите економии се натпреваруваат преку доверливост, напиша тој.
Муцунски во постот додава дека затоа инвестираат во стратешките Коридори VIII и X, енергетската диверзификација и поврзаноста. Економскиот суверенитет е тесно поврзан со тоа колку сме инфраструктурно и енергетски поврзани.
-Во свет на сè поголема неизвесност, иднината не е во градењето повисоки ѕидови, туку во создавањето поотпорни мостови, посилни партнерства и поголема поврзаност, напиша тој.