Министерката за финансии Гордана Димитриеска-Кочоска и гувернерот на Народната банка Трајко Славески остварија средба со заменикот на генералниот директор на Меѓународниот монетарен фонд (ММФ), Бо Ли, во рамки на Годишните средби на ММФ и Групацијата на Светската банка во Бангкок.
На разговорите биле разгледани макроекономските состојби, влијанието на глобалните случувања врз домашната економија и важноста на независноста и транспарентноста на централните банки за одржување на економската стабилност.
Од Народната банка посочуваат дека внимателното водење на економските политики е особено важно во услови на геополитичка неизвесност и нестабилни цени на светските пазари. Како значајни фактори за домашната економија биле издвоени движењата на цените на енергенсите и нивното можно влијание врз инфлацијата.
На средбата било нагласено дека мерките на Народната банка придонеле за стабилизирање на инфлацијата, зачувување на стабилноста на девизниот курс и зајакнување на отпорноста на економијата.
Посебно внимание било посветено на независноста на централната банка, нејзината отчетност и транспарентната комуникација со јавноста, како предуслови за доверба во институциите и спроведување доследна монетарна политика.
Била потврдена и определбата за продолжување на соработката меѓу Народната банка и ММФ преку техничка помош, советодавна поддршка и јакнење на институционалните капацитети, со цел одржување на ценовната и финансиската стабилност.