Петнаесетгодишно девојче од Гватемала, за кое семејството верувало дека починало, се разбудило во ковчегот за време на сопствениот погреб, откако претходно изгубило свест на пат кон медицински центар.
Таткото на девојчето, кој е евангелистички пастор, раскажал дека во еден момент неговата ќерка престанала да реагира и не можел да ѝ почувствува пулс. „Видов дека веќе не дише и не можев да ѝ го почувствувам пулсот на зглобовите. Тоа беше многу тешка ситуација за мене. Таа не стигна до болницата,“ изјавил таткото за локалните медиуми.
И покрај тоа што смртта не била потврдена од лекар ниту бил издаден официјален документ, семејството организирало погреб околу осум часа подоцна во селото Ел Хокоте. Додека присутните се простувале, мајката забележала дека нејзината ќерка се движи. „Постојано повторував дека е жива и дека не е мртва,“ раскажала мајката, Лесвија Риос.
Кога го отвориле прозорчето на ковчегот, девојчето ги отворило очите, седнало и започнало да разговара со присутните. Подоцна таа изјавила дека почувствувала силна болка во срцето и тежина пред да онесвести.
Девојчето било пренесено во болница во Уеуетенанго за дополнителни прегледи, додека обвинителството во Гватемала отвори истрага за утврдување на околностите под кои бил организиран погреб без лекарска потврда за смрт.