Дваесет и седумгодишен маж е убиен денеска околу 12 часот во центарот на Тутлинген, Германија, по престрелка со полицијата, потврди Државната криминалистичка служба (LKA), која ја презеде истрагата за случајот.
Според досегашните информации, мажот претходно без очигледна причина отворил оган кон полициските службеници. По престрелката тој бил тешко повреден, а обидите за реанимација биле неуспешни.
„Обидите за реанимација, за жал, не успеаја“, соопштија од LKA.
Како што сведочат очевидци, младиот маж најпрво бил забележан во зградата на градската управа со пиштол во раката, по што вработените веднаш повикале полиција и се заклучиле во канцелариите. Кога ја напуштил зградата во улицата Хелферај, полицајците го пресретнале, а според портпаролката на LKA, тој тогаш без предупредување пукал кон нив.
Околу 12:30 часот дошло до престрелка во која вооружениот маж бил смртно ранет, а сведоците изјавиле дека слушнале пет истрели. Во моментот на инцидентот околните објекти биле полни со луѓе.
„Пукаше директно пред нашата тераса“, раскажала сопственичката на локалниот ресторан „Остерија“, Силке Д’Амико, додавајќи дека гостите биле брзо тргнати на сигурно и дека сите се во шок.
Засега останува нејасно што го натерало мажот да пука, а од LKA потврдија дека мотивот и околностите се предмет на понатамошна истрага, додавајќи дека тој не им се заканувал на случајните минувачи.