Во судницата во „Идризово“ при Основниот кривичен суд Скопје денеска продолжува судењето за пожарот во дискотеката „Пулс“ во Кочани, во кој животот го загубија 63 лица, а повеќе од 200 беа повредени.
Предметот е во доказна постапка, а денешното рочиште треба да продолжи со изведување докази предложени од одбраната.
На претходното рочиште сведочеше вештото лице и технички советник од областа на градежништвото Петре Русевски, предложен од првообвинетиот и сопственик на дискотеката Дејан Јованов. Тој посочи дека закупецот на просторот не извршил градежни активности што би можеле да се сметаат за реконструкција, туку градежно-занаетчиски работи и ентериерно уредување за потребите на дејноста.
По ваквата изјава реагираа родители на загинатите, кои во судницата го нарекоа првообвинетиот „убиец“. Судот потоа побара дел од родителите да ја напуштат судницата.
Обвинителството претходно го заврши изведувањето на своите докази. Беа изведени 1.390 материјални докази, а беа сослушани 45 сведоци и пет вешти лица. Одбраната досега најави 244 сведоци.
Со предметот раководи судијката Дијана Груевска-Илиевска, додека обвинението го застапува тим од 15 јавни обвинители.
Пожарот во дискотеката „Пулс“ избувна на 16 март 2025 година за време на настап на групата ДНК. Во трагедијата загинаа 63 лица, а повеќе од 200 беа повредени.