Со серија едукативни и научно-популарни активности, Македонија годинава се приклучува кон одбележувањето на Светската недела на вселената. Манифестацијата се одржува од 4 до 10 октомври под мотото „Ракетна револуција“, со фокус на брзиот развој на вселенскиот сектор и сè поголемото учество на приватниот сектор, стартапите и академските тимови.
Светската недела на вселената се одбележува во чест на два значајни датуми – лансирањето на „Спутник 1“, првиот вештачки сателит, на 4 октомври 1957 година и потпишувањето на Договорот за мирно користење на вселената на 10 октомври 1967 година.
Според националната координаторка на манифестацијата во Македонија, Марина Таневска, активностите имаат цел да ги доближат вселенските истражувања и современите научни достигнувања до јавноста, но и да ги поттикнат младите да се интересираат за науката и технологијата.
Во земјава се најавени повеќе настани, меѓу кои натпревар за избор на вселенски мурал, онлајн панел-дискусија „Жените во вселената: патишта, перспективи и можности“, како и предавање на Скопското астрономско друштво на тема „Колку е голема Вселената“.
Дел од програмата се и едукативни активности во градинки и училишта низ земјава, каде најмладите ќе имаат можност да се запознаат со астрономијата, вселенските мисии и новите технологии.
Минатата година, Светската недела на вселената била одбележана со околу 50.000 настани во повеќе од 100 земји, а организаторите очекуваат и годинава да привлече голем број учесници.