Американската сојузна држава Тенеси не успела да ја изврши смртната казна врз 50-годишната Криста Гејл Пајк, осудена за убиство извршено кога имала 18 години. И покрај тоа што ѝ биле дадени две дози пентобарбитал, таа останала жива, по што со брза помош била пренесена во болница, а нејзината здравствена состојба во моментот не била позната.
Новинарите присутни на егзекуцијата сведочеле дека Пајк била врзана за носилка, при што во еден момент прашала дали е нормално нејзината рака да се чувствува на одреден начин. По втората доза дадена до 20:26 часот, зад повлечената завеса се слушало како таа гласно дише и ‘рчи, пред микрофонот да биде исклучен во 20:53 часот. Адвокатите веднаш побарале итен прекин и медицинска помош.
Според Центарот за информации за смртната казна, не е познат претходен пример во кој осуденик останал жив по дадените лекови. Егзекуцијата првично била блокирана од апелационен суд поради трауми од детството, но Врховниот суд ја укинал суспензијата. Доколку успееше, Пајк ќе станеше првата жена погубена во Тенеси по повеќе од 200 години. По инцидентот, гувернерот Бил Ли ги стопирал преостанатите егзекуции и наредил независна истрага за утврдување на пропустите.