Неколку пациенти во Црна Гора развиле симптоми на ботулизам по примање ботокс, но нивната состојба е стабилна и не се во животна опасност. Лекарите се сомневаат дека бил употребен неисправен или лажен препарат означен како „Диспорт“.
Според неврологот Балша Вујовиќ, станува збор за исклучително ретка реакција, каква што лекарите практично немале можност да видат во последните дваесет години.
Ботулинскиот токсин може да се прошири и на мускули на кои не требало да влијае, а меѓу можните симптоми се спуштени очни капаци, двоен вид, асиметрија на лицето и мускулна слабост. Во потешки случаи може да се јават и проблеми со голтањето, промени во гласот и тешкотии со дишењето.
Неколку пациенти минатата недела биле хоспитализирани во Клиничкиот центар на Црна Гора, а болницата тогаш соопштила дека постои основано сомнение дека бил употребен неисправен или фалсификуван препарат.