Се воведува дигитална студентска превозна картичка за јавниот превоз во Скопје, соопшти ВМРО-ДПМНЕ. Решението е подготвено во соработка меѓу ЈСП, ФИНКИ и универзитетите „Св. Кирил и Методиј“ и „Мајка Тереза“.
Според партиското соопштение, студентите повеќе нема да треба да доставуваат хартиени потврди ниту лично да одат на шалтер за заверка. Студентскиот статус ќе се потврдува преку автоматска размена на податоци меѓу ЈСП и универзитетите.
Дигиталната картичка ќе биде достапна преку апликацијата SkopjeBus. Студентите ќе добијат упатства на својата електронска адреса и ќе се најавуваат со истата адреса што ја користат на универзитетот.
По активирањето, QR-кодот од мобилниот телефон ќе се користи за валидација при влез во автобусите.
Од ВМРО-ДПМНЕ најавуваат дека нивната Унија на млади сили ќе го следи спроведувањето на новиот систем и ќе ги пренесува забелешките и предлозите на студентите до надлежните институции.