Една од научничките чии откритија го отворија патот до лекови како Оземпик и Вегови, Светлана Мојсов, денеска ќе одржи предавање во Македонската академија на науките и уметностите.
Светски реномираната биохемичарка ќе говори на тема „GLP-1: Хемијата е од суштинско значење – од потенцијален пептид до ефикасни лекови за дијабетес и дебелина“.
Мојсов има клучен придонес во откривањето на биолошки активната форма на хормонот GLP-1 и во докажувањето дека тој го стимулира лачењето инсулин. Токму врз овие истражувања подоцна е развиена цела класа лекови за дијабетес и дебелина, меѓу кои и семаглутидот, активната состојка во Оземпик и Вегови. За придонесот во откривањето и развојот на GLP-1 терапиите, Мојсов заедно со Џоел Хабенер и Лоте Бјере Кнудсен ја доби престижната награда Ласкер во 2024 година.
Во саботата, претседателката Гордана Сиљановска-Давкова ја одликуваше Мојсов со Орден „8 Септември“ за нејзиниот фундаментален придонес во светската наука и афирмацијата на Македонија.
Светлана Мојсов е родена во Скопје во 1947 година. Докторирала на Универзитетот Рокфелер во Њујорк, а научната кариера ја продолжила во Општата болница во Масачусетс и повторно на Рокфелеровиот универзитет.
Нејзината работа денес се смета за една од основите на современите терапии за дијабетес и дебелина, кои ги користат милиони пациенти ширум светот.