Православните верници денеска го одбележуваат Крстовден, празникот посветен на Воздвижението на чесниот Господов крст, кој се слави во спомен на наоѓањето на крстот врз кој бил распнат Исус Христос и неговото враќање од Персија во Ерусалим.
Според црковното предание, наоѓањето на чесниот крст во четвртиот век ѝ се припишува на царицата света Елена, мајката на царот Константин Велики. По откривањето на трите крста на Голгота, вистинскиот Христов крст бил препознаен преку чудата на исцелување на болна жена и воскресение на покојник. На овој ден се одбележува и неговото враќање од персиско заробеништво во 628 година, кога царот Ираклиј лично го пренел во Ерусалим.
Црквата овој празник го определила како строг пост и тежок празник во знак на сочувствување со страдањата на Спасителот. Според народните обичаи, денеска не се работи, се практикува строг пост „за крст“, а во одредени региони се изведуваат традиционални обреди со осветена вода и благословување на семејството и земјоделските семиња.
Именден на овој ден празнуваат: Крсте, Крстинка, Крстана, Кристина, Христина, Кристијан и други.
Спаси ги, Господи, луѓето Твои, и благослови го наследството Твое, победи на благоверниот народ наш над непријателите давајќи му, и со Крстот Твој заштити го Твоето жителство.