Агенцијата за храна и ветеринарство (АХВ) во текот на јули и август спровела 560 вонредни инспекциски контроли кај производители на сладолед и мраз, како и во угостителски објекти кои произведуваат вакви производи за сопствени потреби.
При контролите биле утврдени повеќе неправилности, поради што биле издадени 140 решенија. Дополнително, изречени биле 45 парични казни во вкупна вредност од околу 19.430 евра во денарска противвредност.
Од АХВ информираат дека како небезбедни биле отстранети и уништени вкупно 202 килограми и литри сладолед и мраз.
Инспекторите утврдиле дека 17 оператори не биле регистрирани во АХВ, додека 64 немале извршено лабораториски анализи на сладоледот или мразот. Кај 20 оператори биле констатирани неправилности во означувањето на производите, а кај тројца било утврдено дека мразот го набавувале од нерегистриран добавувач.
Контролите покажале и дека во 10 објекти имало вработени без задолжителни здравствени прегледи. Несоодветни хигиенски и технички услови биле утврдени кај пет оператори.
Дополнително, 19 оператори немале воспоставено соодветни процедури за добра производствена и хигиенска практика, како и за чистење на ледоматите. Кај четири оператори недостасувале записи за следливост, додека кај еден биле утврдени пропусти во спроведувањето на задолжителните мерки за дезинфекција, дезинсекција и дератизација.
Од АХВ посочуваат дека контролите биле спроведени согласно законските обврски за безбедност на храната.