Средношколци од 22 средни училишта од Скопје ќе се обединат во заедничка иницијатива посветена на животните и поддршката на Зоолошката градина Скопје, во рамки на дводневниот базар „100 години Зоолошка – 100 години грижа за животните“.
Базарот ќе се одржи денеска и утре, од 12 до 15 часот, во Зоолошката градина Скопје, по повод одбележувањето на 100-годишниот јубилеј од нејзиното основање.
На настанот средношколците ќе ги претстават своите креативни производи, ракотворби и изработки, кои посетителите ќе можат да ги купат. Средствата собрани од продажбата ќе бидат наменети за потребите и грижата за животните во Зоолошката градина.
Организаторите велат дека целта на базарот е да се поттикнат креативноста, емпатијата и одговорноста кај младите, како и нивната грижа за животните. Воедно, настанот им овозможува на средношколците активно да се вклучат во одбележувањето на 100-годишнината на една од најстарите институции во Скопје.
Од Зоолошката градина ги повикуваат граѓаните, семејствата и љубителите на животните да го посетат базарот, да ја поддржат креативноста на младите и заеднички да бидат дел од одбележувањето на големиот јубилеј на Скопје ЗОО.