Војната во Украина нема да заврши со руска победа, оцени американскиот државен секретар Марко Рубио, посочувајќи дека руската армија бележи слаби резултати на бојното поле. Според него, конфликтот е штетен и за Украина и за Русија и единственото реално решение на крајот ќе бидат преговори.
Рубио изјави дека колку побрзо започне политичко решение, толку помалку животи ќе бидат загубени и помала ќе биде штетата од војната. Тој додаде дека администрацијата на Доналд Трамп ќе продолжи со обидите да ги приближи позициите на Москва и Киев, иако во моментов двете страни сè уште се далеку од мировен договор.
Изјавата доаѓа еден ден по средбата на Трамп со украинскиот претседател Володимир Зеленски во Њујорк. Американскиот претседател тогаш порача дека е време војната да заврши и дека Вашингтон разговара и со рускиот претседател Владимир Путин за можен договор.
Зеленски, пак, изјави дека Киев и Вашингтон разговарале за чекори за деескалација кои би можеле да отворат пат за дипломатија. Тој најави и предлог за взаемен прекин на нападите врз енергетската инфраструктура – Украина да ги запре нападите врз руските рафинерии и енергетскиот систем доколку Москва престане со нападите врз украинската енергетика.
Од руска страна засега нема сигнал за брз прекин на војната. Министерот за надворешни работи Сергеј Лавров порача дека Москва ќе продолжи со воените операции сè додека не бидат исполнети нејзините цели.