Во државното средно училиште со ресурсен центар „Партенија Зографски“, наставниците покажуваат дека може да се најде соодветен начин и средства за комуникација со секое дете, согласно неговите можности. Повод за тоа е одбележувањето на Меѓународниот ден на знаковниот јазик, на кое министерката за образование и наука Весна Јаневска порача дека сите деца имаат право да учат, да знаат и да стекнуваат вештини кои ќе им користат во животот и работата.
Потенцирајќи ја важноста на знаковниот јазик, министерката Јаневска истакна:
„Знаковниот јазик им помага да се ‘слушнат’ меѓу себе и нив да ги ‘чујат’ другите. Тој им го олеснува образованието. Како министерство, работиме на отстранување на бариерите и соработуваме со училиштата со ресурсни центри во обезбедувањето дидактички материјали, асистивна технологија и поддршка во употребата на знаковниот јазик. Обезбедуваме континуирани обуки за наставниците за изучување на знаковниот јазик. Зашто, од тоа зависи квалитетот на образованието што ќе го добијат учениците“.
По потсетувањето дека Македонија е потписничка на Конвенцијата за правата на лицата со попреченост, министерката нагласи дека борбата против стигмата и дискриминацијата е хумана должност.
„Дозволете ми да забележам дека како општество треба уште да работиме на промена на ставовите кон лицата со попреченост. Подигнувањето на свеста за нивните права, едукативните активности и комуникација се начини на борба против стигмата и дискриминацијата, кои не се наша обврска само поради потпишаните документи, туку се наша човечка должност кон секого“, рече Јаневска.