Администрацијата на американскиот претседател Доналд Трамп планира во 2027 година да го ограничи бројот на бегалци примени во САД на 17.500, при што приоритет ќе имаат претежно белци од Јужна Африка.
Во официјалното известување до Конгресот, администрацијата нагласува дека белците Јужноафриканци се соочуваат со ризик од одземање на земјиште и други форми на прогон, како и дека веројатно ќе се интегрираат при пристигнувањето во САД.
Од друга страна, владата на Јужна Африка постојано го отфрла тврдењето дека белците Јужноафриканци се прогонувано малцинство во својата татковина.
Оваа одлука претставува драматична промена во долгогодишната програма за бегалци на Вашингтон, која им овозможуваше на десетици илјади луѓе од целиот свет да започнат нов живот во САД.
Во пораката до Конгресот се наведува и намерата да се потрошат околу 500 милиони долари за новодојденците во земјата.
Организациите кои со години работат на преселување на бегалците остри ја критикуваа одлуката програмата повторно да се ограничи на белци од Јужна Африка.
Претседателите го одредуваат максималниот број бегалци годишно. Историски гледано, овие бројки се распоредуваа низ различни региони поради светските конфликти. Од почетокот на програмата во 1980 година, САД примаат просечно 92.000 луѓе годишно.
Минатата година, администрацијата на Трамп првично постави квота од 7.500 луѓе, претежно Африканци, но подоцна го зголеми бројот на 17.500 откако рече дека „непредвидените случувања во Јужна Африка создадоа извонредна ситуација со бегалците“.
За време на првиот мандат, Трамп значително го намали бројот на одобрени бегалци, додека демократската администрација на Џо Бајден ја обнови програмата со цел за прием на 125.000 бегалци во последната година од мандатот.