Премиерот Христијан Мицкоски денеска во Њујорк оствари официјална средба со заменик-државниот секретар на САД, Кристофер Ландау, јави специјалниот известувач на МИА од Њујорк.
На средбата од американската страна присуствувале и Брендан Харнахан, помошник-државен секретар за Европа и Даниел Лотон, заменик помошник-државен секретар за Европа во чиј непосреден ресор спаѓаат и балканските држави.
Официјалните средби со високата делегација на Стејт Департментот доаѓаат по средбата на премиерот Мицкоски со државниот секретар Марко Рубио вчера во Њујорк.
„Средбата беше можност за отворен и суштински разговор за стратешкото партнерство со Соединетите Американски Држави, за продлабочување на политичкиот и економскиот дијалог, како и за прашањата од заеднички интерес за двете држави. Во време на сериозни геополитички предизвици и промени во меѓународните односи, за нас е од исклучително значење да има силни, стабилни и принципиелни односи со своите стратешки партнери. Соединетите Американски Држави се наш долгогодишен стратешки партнер и сојузник, а директната комуникација на високо политичко ниво е важен дел од натамошното зајакнување на тие односи“, вели премиерот Мицкоски во објавата на неговиот Фејсбук профил.