Општина Центар ги засили инспекциските контроли на градилиштата на својата територија, при што во текот на изминатата недела биле проверени 10 активни локации.
Од Општината информираат дека при контролите, спроведени и во доцните попладневни часови, биле констатирани прекршувања поврзани со комуналниот ред и јавната чистота. За утврдените неправилности биле изречени шест казни од по 1.300 евра.
Дополнително, на три локации биле отстранети бесправно поставени блокатори и столпчиња на јавни површини.
„Инспекциските служби се на терен. Покрај редовните надзори, спроведуваме и вонредни контроли за заштита на животната средина, спречување на загадувањето, одржување на јавната чистота и обезбедување безбедни тротоари и улици. Нема да толерираме нарушување на јавниот простор“, изјави градоначалникот Горан Герасимовски.
Од Општина Центар ги повикуваат инвеститорите и градежните компании да ги почитуваат законските обврски и да преземат соодветни мерки за заштита на околината при изведување на градежни работи.