Во Домот на културата во Ченто денеска е отворена канцеларијата „Една точка за услуги“, наменета за граѓаните на Општина Гази Баба.
На отворањето присуствуваа градоначалникот на Општина Гази Баба, Бобан Стефковски, министерот за дигитална трансформација Стефан Андоновски и пратениците Зоран Коцевски и Дијана Илиевска.
Стефковски информираше дека тој бил првиот граѓанин кој ја искористил новата услуга, при што преку канцеларијата извадил документ – евиденција за годините работен стаж.
Преку канцеларијата „Една точка за услуги“, граѓаните ќе можат да добијат информации, насоки и конкретна поддршка при користењето на 338 електронски услуги достапни преку националниот портал uslugi.gov.mk.
Целта на новата услуга е да се намали времето потребно за административни постапки, да се избегне непотребното посетување на повеќе институции и услугите да станат подостапни за граѓаните.
„Дигитализацијата има смисла тогаш кога му го олеснува животот на човекот. Помалку административни обврски. Повеќе достапни услуги. Институциите поблиску до граѓаните“, порача Стефковски.