Од ВМРО-ДПМНЕ денеска реагираат на состојбите во македонскиот правосудствен систем, посочувајќи на селективност и двојни аршини во судските пресуди. Портпаролот на партијата, Валентин Манасиевски, на прес-конференција истакна дека додека за одредени прекршоци се изрекуваат високи затворски казни, за капиталните случаи и трагедии нема судска завршница.
„За кубење на коса, се добива 4 години затвор. За кражба на 150 ќебапи, се добиваат 3 години затвор. А за случајот Ласкарци, каде загинаа 16 луѓе, за случајот со модуларната болница, каде загинаа 14 луѓе или пак за случајот Мазут, вреден 167 милиони евра, имаме нула години затвор и нула одговорност“, изјави Манасиевски.
Според него, ваквите состојби се резултат на влијанијата на поранешните структури на СДС и ДУИ во институциите, поради што граѓаните целосно ја губат довербата во правниот систем.
„Правосудството не смее да биде штит на СДС и на ДУИ. Законот мора да важи еднакво за сите“, порача портпаролот на ВМРО-ДПМНЕ.