11 септември 2001 година беше еден од најмрачните денови во американската историја, но злото не победи, изјави денеска американскиот министер за одбрана Пит Хегсет на комеморацијата во Пентагон по повод 25-годишнината од терористичките напади во кои загинаа околу 3.000 лица.
„Овие подли и кукавички напади ја променија Америка на начин што дури и звукот на тие авиони ја тресе душата до ден-денес. Сепак, тие ја променија Америка на поинаков начин отколку што се надеваа кукавиците. Гледате, нивните напади наместо тоа охрабрија милиони луѓе да чекорат напред“, рече тој.
Овој функционер на администрацијата на Трамп, кој често се свртува кон религијата кога зборува за војна и конфликт, го стори тоа и овој пат, објави Скај њуз, наведувајќи дека Хегсет цитирал делови од Книгата на пророкот Исаија и истакнал дека злото не го имало последниот збор тој ден.
„Никогаш не се случило и никогаш нема да се случи. Ќе ја завршиме оваа борба“, рече Хегсет, поврзувајќи го 11 септември со војната против Иран.
Тој изјави дека во текот на изминатите шест месеци, САД го уништија најголемиот државен спонзор на тероризмот во светот.
„Нашите воини се борат против исламската теократија која ни посакува смрт речиси половина век. Тие го славеа 11 септември, но не сметаа на овој претседател“, рече американски функционер.
Хегсет на крајот вети дека САД ќе ја завршат оваа борба.
Во нападите од 11 септември 2001 година, членови на Ал Каеда киднапираа четири патнички авиони. Два авиона се урнаа во кулите на Светскиот трговски центар во Њујорк, еден во Пентагон, додека четвртиот се урна во близина на Шанксвил, Пенсилванија, а околу 3.000 луѓе загинаа во нападите.