Татко на ученик од петто одделение е осуден на шест месеци затвор и веднаш е пренесен во затворот во Сес, откако се заканувал дека ќе обезглави наставничка во училиште во градот Фаго, јужно од Тулуз.
Покрај затворската казна, судот му изрече забрана за приближување до училиштето и до наставничката во времетраење од три години, забрана за поседување оружје во следната година, обврска да посетува курс по граѓанско образование, како и да ѝ исплати на жртвата симболична отштета од едно евро.
Јавниот обвинител претходно предложи казна од шест месеци со носење електронска нараквица и мерки за забрана за контакт и приближување до училишниот објект.
Обвинетиот, роден во 1979 година во Тулуз, за време на судското рочиште изјави дека „нема зборови да го објасни“ своето однесување.
Според градоначалникот на Фаго, Жан-Мари Пјуж, инцидентот уследил откако детето на осудениот создавало проблеми за време на наставата.
„Детето го прекинувало часот, наставникот го испратил во друг час за да се обиде да го смири, но кога стигнал во другата училница, според изразот што го користат наставниците, продолжил да се однесува како насилник“, рече градоначалникот.
Тој појасни дека родителот ја чекал наставничката пред објектот и ѝ упатил директна закана дека ќе „ѝ ја отсече главата“.
Министерот за образование Едуар Џефри оцени дека „известените факти се исклучително сериозни“ и упати поддршка до наставничката, соработниците и семејствата на учениците.
„Поднесена е пријава и на наставничката ѝ е дадена официјална заштита. Ниеден наставник не треба да се плаши додека си ја работи работата. Напад врз еден од нив е напад врз целата институција“, рече францускиот министер за образование на социјалната мрежа X.
Тој додаде дека е покрената и постапка за можно префрлање на ученикот во друго училиште и потсети на декретот од изминатото лето за заштита на наставниот кадар од насилство. Наставниците од училиштето во понеделникот стапија во штрајк, а заменик-градоначалничката Изабел Банерис истакна дека жителите се шокирани од настанот.