Цената на дизелот во САД за првпат во историјата се искачи над шест долари за галон, зголемувајќи го ризикот од нов инфлаторен притисок врз американската економија.
Националниот просек достигна 6,0556 долари за галон, додека во Калифорнија цената се приближува до осум долари. Пресметано во денари, националниот просек во САД е 85 денари за литар, додека на бензинските пумпи во Калифорнија, цените достигнуваат и до 112 денари. Рекордот доаѓа непосредно пред периодот кога традиционално расте побарувачката за дизел поради греењето, земјоделските активности и транспортот.
Високата цена на дизелот има пошироко економско влијание бидејќи горивото масовно се користи во товарниот транспорт, земјоделството, градежништвото и производството. Поради тоа, поскапувањето може да се прелее и врз цените на храната и другите производи преку повисоки транспортни трошоци.
Глобалната понуда е ограничена поради повеќемесечните украински напади врз руските рафинерии, проблемите со испораките низ Ормускиот Теснец и намалениот рафинериски капацитет на Блискиот Исток.
Дополнителен притисок создава и новата ескалација околу Ормускиот Теснец и Баб ел Мандеб, што ги зголемува стравувањата дека високите цени на енергентите би можеле да се задржат подолг период.