Граничната агенција на ЕУ, Фронтекс, во првите осум месеци од оваа година регистрираше значително помалку неовластени гранични преминувања на надворешните граници на Европа отколку во истиот период во 2025 година, соопшти денеска агенцијата, пренесе ДПА.
Фронтекс регистрираше повеќе од 74.000 нерегуларни влезови, што претставува пад од 35 отсто во споредба со истиот период минатата година, соопшти агенцијата од нејзиното седиште во Варшава.
Фронтекс соопшти дека падот на речиси сите главни миграциски рути се должи на актуелната соработка со земјите-партнери и превентивните мерки што се преземаат во главните земји на потекло на мигрантите.
Меѓутоа, Фронтекс признава дека во извештајот не е земен во предвид големиот премин на мигранти од Мароко до шпанската енклава Сеута на крајот на јули.
Конечната вкупна бројка веројатно не може да се утврди, соопшти агенцијата, бидејќи повеќето од оние што ја преминале границата се вратиле во Мароко пред да бидат регистрирани.
Според шпанската Влада, околу 80.000 луѓе привремено влегле во енклавата кон крајот на јули. Мароко го процени бројот на пристигнати на околу 40.000. Во обидот да стигнат до Сеута загинаа 83 лица. Инцидентот предизвика дебата за заштитата на надворешните граници на Европската Унија и одговорностите на Шпанија.
Извори од Фронтекс изјавија дека иако ситуацијата на надворешните граници на ЕУ во текот на летото беше мирна, Сеута покажа дека дури и мирна гранична ситуација може да се промени во рок од неколку часа.
Шверцерските мрежи не исчезнаа кога се намали бројот на мигранти, забележа агенцијата. Напротив, шверцерите на луѓе едноставно ја чекаат следната можност. Тоа е токму моментот кога Фронтекс треба да биде подготвен, наведуваат изворите.
Според податоците на Фронтекс, главните миграциски рути продолжуваат да се движат преку Средоземното Море, кое мигрантите се обидуваат да го поминат со брод. Источната медитеранска рута од Турција до Грција и централната медитеранска рута од Либија и Тунис до Италија и Малта заедно сочинуваат речиси 60 отсто од регистрираните нерегуларни влезови.