Поранешниот директор на Државна лотарија, Перпарим Бајрами, кој повеќе од една година беше во бегство и недостапен за надлежните органи, утрово сам се предал и е лишен од слобода.
Бајрами е меѓу главните осомничени во случајот за злоупотреби во „Државна лотарија“, за кој беше распишана и меѓународна потерница. Покрај него, во истиот предмет е опфатен и поранешниот вицепремиер Артан Груби.
Официјални детали од Министерството за внатрешни работи се очекуваат во текот на денот.
Покрај Груби и Бајрами, на листата обвинети во овој случај се наоѓаат уште шест лица: Методија Димевски, Скендер Мехмети, Бојан Јанев, Фатмир Рамадановски, Александар Димитриоски и Башким Авдиу.
На судското рочиште што се одржа неделава, сите присутни обвинети се изјаснија дека не се чувствуваат виновни. Исклучок беше обвинетиот Башким Авдиу, кој посочи дека не го разбира обвинението и побара тоа да му биде доставено во писмена форма на неговиот мајчин, албански јазик.
Обвинението, застапувано од јавните обвинители Даниел Коцев и Александар Давчевски, ги товари обвинетите за дејствија преземени во текот на 2023 и 2024 година. Според ОЈО, со пречекорување на службените овластувања и проневера е предизвикана материјална штета на „Државна лотарија“ во износ од 596.125.511 денари.