Поранешниот вицепремиер Артан Груби денеска пред Основниот кривичен суд Скопје изјави дека не се чувствува виновен за делото што му се става на товар во случајот за злоупотреби во АД „Државна лотарија“.
Покрај Груби и поранешниот директор на „Државна лотарија“, Перпарим Бајрами, на кој му се суди во отсуство, во овој предмет обвинети се уште шест лица: Методија Димевски, Скендер Мехмети, Бојан Јанев, Фатмир Рамадановски, Александар Димитриоски и Башким Авдиу.
На денешното рочиште сите присутни обвинети се изјаснија дека не се чувствуваат виновни. Исклучок беше обвинетиот Башким Авдиу, кој изјави дека не го разбира обвинението што му се става на товар и побара тоа да му биде доставено писмено на неговиот мајчин, албански јазик.
Обвинението, кое го застапуваат јавните обвинители Даниел Коцев и Александар Давчевски, се однесува на дејствија преземени во текот на 2023 и 2024 година. Според ОЈО, обвинетите ги пречекориле службените овластувања и предизвикале штета на „Државна лотарија“ во износ од 596.125.511 денари, со што се товарат за кривичното дело злоупотреба на службената положба и овластување.
За докажување на вината, Јавното обвинителство најави изведување на 231 материјален доказ, вештачења и сослушување на седум сведоци.
По барањето на обвинетиот Авдиу за превод на обвинението, судијката Билјана Шуплиновска-Јовевски го одложи судењето за в петок.
Инаку, Артан Груби во февруари годинава беше уапсен на граничниот премин Блаце по повеќе од 14 месеци бегство. По распитот во Обвинителството, наместо во затворски притвор, кој претходно му беше определен во отсуство, од безбедносни причини му беше одреден куќен притвор.