На територијата на Град Скопје има само еден активен пожар на отворен простор кој пред два дена од косовска страна навлезе на македонска територија кај селото Грачани, општина Ѓорче Петров, соопшти директорот на Дирекцијата за заштита и спасување (ДЗС), Стојанче Ангелов.
Пожарот не загрозува населени места, а во него се зафатени пред сè трева, грмушки и ниски смреки кои создаваат силен пламен и чад, додека на одделни места огнот се движи ниско по земја низ мешовита шума.
Во средата во гаснењето учествуваа скопските пожарникари и два „ер трактори“ на ДЗС, додека во четвртокот македонски полициски хеликоптер им помогна на косовските противпожарни служби од другата страна на границата каде што огнот беше поинтензивен.
Поради насоката на ветерот во текот на изминатата ноќ, чадот од пожарот можеше да се почувствува над неколку скопски населби.
„Тоа е истиот оној чад кој сите ние кои работиме на гаснење на пожари на отворен простор го вдишуваме секојдневно, од непосредна близина, во неспоредливо поголема концетрација“, наведува Ангелов во соопштението.
Екипите на скопската противпожарна бригада цела ноќ дежураа на делови од линијата на пожарот, но поради тешко пристапниот терен гаснењето било отежнато.
Утрово интервенцијата продолжува со засилен број пожарникари на терен и воздушна поддршка од два „ер трактори“ на ДЗС, еден полициски и еден армиски хеликоптер.
Според податоците од ДЗС, во текот на вчерашниот ден на ниво на целата држава беа евидентирани вкупно 31 пожар на отворен простор.