Телефонскиот именик на обвинетиот апелациски судија Ѓоко Ристов беше во фокусот на денешното рочиште, каде што обвинителката Искра Хаџи-Василева прочита низа познати имиња од политичкиот и бизнис-секторот зачувани меѓу неговите контакти.
Меѓу споменатите лица се Бојан Јовановски – Боки 13, Ана Камчева, пратеникот од ДУИ Исмаил Јахоски (запишан како „бабе Исмаил“) и неговиот син Асмир Јахоски, сопственик на „Пуцко Петрол“, како и бизнисменот Зоран Азманов, пренесе Скопје1.
На списокот се најдоа и Фехми Стафа, кој во јавноста се поврзува со случајот на осомничениот Љупчо Пецов – Ѓаволот, како и Исмет Гури, поранешен директор на УЈП и опфатен во предметот „Титаник 3“. Во контактите била и поранешната пратеничка Фросина Ременски, а зачуван бил и број за кој обвинителството тврди дека му припаѓа на Вице Заев, брат на поранешниот премиер Зоран Заев.
Иако обвинителството не презентираше содржина од конкретна комуникација меѓу Ристов и наведените лица, обвинителката Хаџи-Василева нагласи дека самото постоење на овие контакти може да се разгледува од аспект на етичките и законските стандарди.
Таа истакна дека во контекст на предметот, кој се однесува на наводни коруптивни практики, контактите на обвинетиот со влијателни фигури од политиката и бизнисот се од важност за постапката пред судот.