Симеон Михаилов, таткото на Ива Михаилова, чиј случај деновиве предизвика голем интерес во бугарската јавност, во дел од тамошните медиуми ја оспорува пресудата против него и тврди дека бил жртва на монтиран процес и дека му бил одземен бизнисот. Македонските институции, сепак, го бараат со активна меѓународна потерница за издржување правосилна затворска казна од 12 години и шест месеци.
Михаилов е еден од осудените во случајот „Детонатор“. Според податоците објавени од македонските медиуми по потврда од МВР, тој е правосилно осуден за обид за убиство, а случајот „Детонатор“ опфаќал и кривични дела како насилство, лихварство, изнуда и злосторничко здружување. Првично му била изречена доживотна казна, која во понатамошната судска постапка била намалена на 12 години и шест месеци.
Станува збор за обидот за убиство на Драганчо Стоименов, познат како Дацо Белски, со експлозивна направа поставена под неговото возило во скопски Аеродром. Михаилов во 2014 година бил екстрадиран во Македонија откако бил уапсен во Италија, а подоцна повторно станал недостапен за македонските органи.
Случајот повторно се актуелизираше откако Михаилов јавно се појави во Софија и даде изјави за бугарски медиуми во одбрана на својата ќерка Ива, на која во Кочани ѝ се суди за сообраќајна несреќа со смртни последици.
По неговото јавно појавување во Бугарија, премиерот Христијан Мицкоски побара Софија да постапи по потерницата и да го испорача Михаилов. Од Министерството за правда соопштија дека постапка за екстрадиција може да започне откако од бугарските власти ќе добијат известување дека лицето е лоцирано или уапсено, а такво известување до 2 септември немало.