Пијана 35-годишна британска државјанка предизвикала сериозен инцидент за време на летот на авиокомпанијата „Рајанер“ на релација од Задар до Бирмингем, соопштуваат хрватските медиуми.
Инцидентот се случил во понеделникот околу 17:10 часот, кога екипажот побарал полициска интервенција поради патничка која со викање и недолично однесување го нарушувала јавниот ред и мир во авионот.
По пристигнувањето на припадниците од аеродромската полициска станица во Задар, било утврдено дека 35-годишната Британка била во видливо алкохолизирана состојба.
Таа одбила секаква соработка со екипажот и полициските службеници, а одбила и да биде подложена на алкотестирање.
За време на интервенцијата, патничката упатувала навреди кон полицајците, по што била приведена во полициска станица со употреба на средства за принуда.
Во службените простории жената продолжила со агресивното однесување и физички нападнала една полицајка, нанесувајќи ѝ полесни телесни повреди.
Таа веднаш била изведена пред Одделот за прекршоци при Општинскиот суд во Задар, каде што ѝ е изречена парична казна во износ од 1.400 евра.
Покрај прекршочната казна, против 35-годишната Британка ќе биде поднесена и соодветна кривична пријава за принуда спрема службено лице, а полицијата презела мерки и согласно Законот за странци.