Соединетите Американски Држави и Украина во моментов водат преговори со кои на Киев би му се доделила лиценца за сопствено производство на пресретнувачки ракети за системот за противвоздушна одбрана „Патриот“, соопшти американскиот државен секретар Марко Рубио.
Иако преговорите се во тек, американските власти предупредуваат дека ова решение нема веднаш да ги задоволи акутните потреби на украинската армија на терен.
„За ова се преговара сега“, рече Рубио во изјава за телевизијата „Фокс њуз“, додавајќи дека тоа „не е моментално решение бидејќи дури и со лиценца, зголемувањето на производствениот капацитет би траело неколку години, поради времето потребно за изградба на фабрики“.
Според неговите зборови, станува збор за „екстремно софистицирано оружје“ и преговорите би можеле да завршат успешно, но тоа нема да ги покрие итните барања на краток рок.
Првиот дипломат на САД потенцираше дека пресретнувачките ракети се дефицитарни на глобално ниво и дека побарувачката е висока во повеќе региони.
Рубио нагласи дека ракетите за воздушна одбрана се многу барани, особено на Блискиот Исток, и дека американскиот производствен капацитет и снабдување се главната пречка за нивно снабдување.