Владата очекува македонската економија и во 2026 година да продолжи да расте, со реален раст на БДП меѓу 3,5 и 4 проценти, изјави премиерот Христијан Мицкоски.
Одговарајќи на новинарско прашање при промоцијата на „Градскиот воз“, Мицкоски рече дека ваквите очекувања доаѓаат во услови кога економијата на Европската Унија, која е најголем трговски партнер на земјава, расте со стапка под еден процент.
Според него, 2024 година Македонија ја завршила со реален раст на БДП од 3 проценти, а 2025 година со 3,5 проценти.
За годинава, покрај реалниот раст од 3,5 до 4 проценти, Владата очекува номиналниот раст на БДП да биде околу 8 проценти.
Мицкоски оцени дека Владата има обврска да ги решава проблемите на граѓаните и најави дека ќе продолжи со реализација на економските политики и проекти.