На 1 септември полициски службеници од Полициската станица за граничен надзор „Охридско Езеро“ спровеле акциски контроли во водите на езерото, насочени кон сузбивање на незаконскиот риболов и откривање на рибарски мрежи и друг недозволен риболовен алат.
На потегот меѓу струшките села Калишта и Радожда биле пронајдени 20 т.н. висечки рибарски мрежи, кои се строго забранети за лов на риба. Мрежите биле со вкупна должина од околу 4.000 метри, а во нив биле уловени 872 парчиња охридска белвица со вкупна тежина од 116,9 килограми.
МВР
По насоки на јавен обвинител, полициските службеници од езерската полиција и Регионалниот центар за гранични работи – Запад ги извадиле мрежите од езерото заедно со уловот. За случајот бил известен и надлежниот инспекторат за рибарство.
Од полицијата информираат дека и во наредниот период ќе продолжат засилените контроли на Охридското Езеро со цел спречување на незаконскиот риболов, откривање на сторителите и заштита на рибниот фонд.