Во судницата во Идризово, при Основниот кривичен суд Скопје, денеска продолжува судењето за пожарот во дискотеката „Пулс“ во Кочани, во кој загинаа 63 лица, а повеќе од 200 беа повредени.
На денешното рочиште треба да биде изведено градежното вештачење, изработено од тим од Градежниот факултет при УКИМ, по што ќе бидат сослушани и вештите лица кои го изработиле. Со тоа, како што е најавено, треба да заврши изведувањето на доказите од страна на Обвинителството, по што одбраната ќе започне со изведување свои докази.
На претходното рочиште, вештакот и професор Горан Марковски, одговарајќи на прашањата на обвинетите, посочи дека пренамената и реорганизацијата на просторот, промените на електричната, водоводната и канализациската инсталација, како и вградувањето несоодветни материјали, непосредно влијаеле врз исполнувањето на основните барања за безбедност на дискотеката „Пулс“.
Марковски истакна дека, согласно Законот за градење, надлежните органи морале да реагираат на незаконските зафати, но реакција изостанала сè до 16 и 18 март 2025 година, кога за првпат биле изготвени записници од инспекциски надзор на веќе опожарениот објект.
Случајот го води судијката Дијана Груевска-Илиевска, а обвинението го застапува тим од 15 јавни обвинители.