Маврово од денеска е во знакот на спортскиот риболов, каде започнува Светското првенство во крапски риболов „Маврово 2026“. На натпреварувањето ќе учествуваат национални тимови од 33 земји од светот.
Свеченото отворање е закажано за попладнево на спортскиот терен кај „Спорт хотел“. На настанот се очекува присуство на претставници на државните институции и локалната власт, Националниот парк „Маврово“, FIPSed и Македонската риболовна федерација, како и членовите на националните селекции, спортски работници и гости од земјава и странство.
Од Македонската риболовна федерација оценуваат дека организацијата на првенството претставува значаен момент за македонскиот спортски риболов.
Ова е првпат Светско првенство во крапски риболов да се одржува во Македонија, а присуството на 33 национални репрезентации го прави настанот еден од позначајните меѓународни спортски собири од овој вид што досега биле организирани во земјава.