Собранието утре ја одржува првата пленарна седница по летните одмори, со 53 точки на дневен ред, но без законите за кои е потребно Бадентерово мнозинство.
Во јавноста се појавија информации дека законите кои се носат со двојно мнозинство би можеле да бидат ставени на посебна седница, откако ДУИ најави блокади на дел од нив. Претседателот на Собранието Африм Гаши денеска не потврди дали ќе има посебна седница, но рече дека при утврдувањето на дневниот ред ќе се земат предвид итноста, политичката волја и реформската агенда.
Гаши информираше дека на денешната координација присуствувал претставник на ДУИ, но дека не се разговарало за најавените блокади.
Тој најави дека ќе побара Комисијата за деловнички и мандатно-имунитетни прашања да разгледа дали опозицијата ги злоупотребува процедуралните можности и тактиките за одолговлекување на собраниските седници.
Меѓу законите за кои е потребно Бадентерово мнозинство се неколку закони од областа на образованието, Законот за правична застапеност, Законот за локална самоуправа и законски решенија поврзани со раководни позиции.
ДУИ претходно најави дека ќе ги блокира законите за кои смета дека се спротивни на Охридскиот рамковен договор. СДСМ, пак, обвинува дека станува збор за договорено сценарио меѓу ВМРО-ДПМНЕ и ДУИ кое треба да доведе до предвремени парламентарни избори. Гаши денеска повтори дека лично смета оти изборите треба да се одржат во редовен термин.
На утрешната седница, меѓу другото, се и изборот на вицегувернер на Народната банка, повеќе ратификации, Предлог-законот за пријавување и проверка на странски директни инвестиции, како и Предлог-националната стратегија за безбедност на сообраќајот на патиштата за периодот 2026–2030 година.