Од утре, 1 септември, стапува во сила нов режим за користење на зоната „Hug & Fly“ пред терминалната зграда на Меѓународниот аеродром Скопје. Возилата и натаму ќе можат бесплатно да застанат до 10 минути за оставање или преземање патници, но истото возило ќе може да ја искористи оваа можност само еднаш во период од 24 часа.
Новите правила ќе се спроведуваат преку систем за автоматско препознавање и евидентирање на регистарските таблички.
Тоа значи дека возило кое еднаш во текот на денот го искористило бесплатниот десетминутен престој, при повторно доаѓање во следните 24 часа нема да може повторно бесплатно да ја користи оваа зона.
За возачите на кои им е потребно подолго задржување или повеќекратно доаѓање на аеродромот, останува на располагање главниот паркинг пред терминалот, кој располага со 1.200 места за автомобили и шест места за автобуси, каде цената за паркирање започнува од 100 денари за престој до еден час.
Новото правило веќе предизвика реакции кај дел од такси-превозниците кои повеќепати дневно превезуваат патници до аеродромот, посочувајќи дека ограничувањето ќе им создаде дополнителни трошоци во работењето. Од ТАВ Македонија, пак, порачуваат дека промената е неопходна за спречување на злоупотребите, намалување на метежот и обезбедување побрз проток на возила пред терминалот.