Иран остро реагираше по новиот американски напад врз иранска територија, оценувајќи дека Вашингтон направил „стратешка и фатална грешка“.
Американските сили нападнале два ракетни лансери на островот Ларак во Ормускиот теснец. Според Корпусот на Исламската револуционерна гарда, во нападот загинале две лица, а уште две биле повредени.
Централната команда на САД соопшти дека станувало збор за „ограничени и прецизни акции“ против сили за поставување мини кои, според американската страна, претставувале непосредна закана во Ормускиот теснец.
Иран возврати со напади врз американски бази во Јордан, а иранските државни медиуми објавија и напад со беспилотни летала врз воздухопловната база Ал Минхад во Обединетите Арапски Емирати, каде се стационирани американски сили. Јорданската војска соопшти дека пресретнала осум ракети.
Портпаролот на Револуционерната гарда, Хосеин Мохеби, порача дека нападот е „стратешка и фатална грешка“ на администрацијата на Доналд Трамп и предупреди дека САД ќе се соочат со економски и воени последици.
Иранскиот претседател Масуд Пезешкијан изјави дека Техеран не бара војна, но дека ќе одговори решително на секоја агресија.
Ова е првиот познат американски напад врз Иран откако Трамп ги прекина обновените воени операции кон крајот на јули.