ВМРО-ДПМНЕ тврди дека изградбата на национален дата-центар е дел од обврските на Македонија во рамки на Реформската агенда со Европската Унија и го обвини лидерот на СДСМ Венко Филипче дека се спротивставува на проект кој е поврзан со европските реформи.
Пратеникот и член на Извршниот комитет на ВМРО-ДПМНЕ, Миле Лефков, изјави дека на државата ѝ е потребен примарен национален дата-центар во кој би се чувале податоците на државните институции.
Според него, Македонија веќе располага со дата-центар во Прилеп, но тој има секундарна улога и служи како резервна локација за чување податоци во случај на проблем или сајбер напад врз системите на институциите.
„Сега секоја институција наоѓа начин како ќе ги чува своите податоци. Затоа на Македонија ѝ треба основен, примарен, национален дата-систем за чување на сите податоци од сите институции“, изјави Лефков.
Од ВМРО-ДПМНЕ велат дека изградбата на национален дата-центар е предвидена во Реформската агенда со ЕУ, при што Унијата обезбедува финансиска поддршка, а Македонија има обврска да го реализира проектот.
Според Лефков, целта е да се зголеми безбедноста на податоците на државните институции и нивната заштита во случај на сајбер напади.
Тој го посочи и сајбер нападот врз системот на Фондот за здравствено осигурување во периодот на претходната власт, кога, како што рече, биле нарушени дел од услугите за граѓаните, меѓу кои исплатата на породилно отсуство и повратот на средства за лекови.
ВМРО-ДПМНЕ ги отфрла критиките на СДСМ за најавениот развој на дата-центрите и оценува дека станува збор за индустрија која е поврзана со дигитализацијата, безбедноста на податоците и современите технологии.
„Евидентно е дека СДС се противи на развој на индустрија која значи заштита на личните податоци на секој поединец и заштита на државните податоци“, порача Лефков.